Semak RM1 juta asil penatai pemisi Bazar Gawai Dayak 2022

Spread the love

KUCHING, 27 Jun: Bazar Gawai Dayak Renggat Nengeri Sarawak 2022 mujur ngerikodka asil penatai pemisi semak RM1 juta.

Ku Menteri Ba Opis Premier Sarawak, Datuk John Sikie Tayai madahka, ari data ke diterima iya lebih RM800, 000 asil penatai pemisi Bazar Gawai Dayak dirikodka sepemanjai timpuh semilan hari ke diatur berengkah 17 nyentuk 26 Jun 2022.

Iya ke mega Kaban Kunsil Nengeri (ADUN) Kakus madahka, iya temegah ati meda sambut ke manah ari mensia mayuh ti nyukung pengawa Bazar Gawai Dayak.

Ba awak ke sama, pedagang ulih nyungkak asil pemisi sida nengah pengawa bazar tu.

“Nitihka data ti diterima, asil penatai pemisi dalam kandang semilan hari tu aja udah lebih RM800,000 enggau malam tu dijangka manggai RM1juta, nyadi tu udah chukup manah,” ku iya.

Iya mansutka jaku nya pengudah bejadika pengawa Nutup Bazar Gawai Renggat Nengeri Sarawak 2022 ti diatur di Opis Kaunsil Mengeri Kuching (MBKS) lebuh Hari Minggu.

John Sikie ke mega Kaban Kunsil Nengeri (ADUN) Kakus madahka, iya temegah ati meda sambut ke manah ari mensia mayuh ti nyukung pengawa Bazar Gawai Dayak.

Berindik ari nya, iya ngarap Bazar Gawai Dayak dudi hari ila ulih diatur lama agi.

“Kitai tetap deka ngatur baru Bazar Gawai tu enggau ngarap deka lama agi diatur,”ku iya.

Bisi 129 iku orang bejual pemakai enggau ai irup kelimpah raban pedagang ti bejualka produk asil pengelandik jari.

Sama bisi datai maya nya, Kaban Kunsil Nengeri (ADUN) Tamin, Christopher Gira Sambang, Sapit Menteri Utiliti enggau Telekomunikasyen I, Datuk Liwan Lagang, Sapit Menteri ba Opis Premier Sarawak (Undang-undang enggau Adat Bumiputera) Jefferson Jamit Unyat enggau ke bukai.


Join our social media channel to get our news Alerts and highlights.

Leave a Reply

Your email address will not be published. Required fields are marked *