Pakej Bantu, Peransang Ekonomi Mantu Rayat Maya Pandemik

Spread the love

KUCHING: Lapan pakej bantu enggau peransang ekonomi beungkus RM530 bilion udah dipejalaika sepemanjai timpuh pandemik COVID-19 nuntung menua.

Pekara tu mandangka perintah seruran ngemeratka rayat, lalu ba awak ti sama ulih ngetanka sektor ekonomi ngambika tetap tegap.

Menteri Pekara Wang, Tengku Datuk Seri Zafrul Tengku Abdul Aziz madahka kesemua pakej nya dipejalai bepelasarka tiga pekara.

“Tiga pekara ti diberi perati iya nya negapka pengerai mensia mayuh nengah program betuchuk vaksin menua, nyaga pengelikun rayat, enggau nentuka pengawa dagang meruan tegap,” ku iya madah.

Ku iya nambah, kitai diatu mekuh ngagai program meri vaksin ngagai mensia mayuh ti nagit deka nuchuk kira-kira 80 peratus peranak di menua tu.

Nangkanka nya, Tengku Zafrul madahka dikena nyaga pengelikun sereta pengerai mensia mayuh, Opis Menteri Pengerai (KKM) udah diberi agih belanja lebih RM3.7 bilion dikena mutarka pandemik COVID-19.

“Ba baruh pakej PRIHATIN, bisi RM1.6 bilion udah diagih, RM1.4 bilion ba baruh agih belanja 2021 enggau RM500 juta belanja udah ditambah ba baruh pakej PEMERKASA,” ku iya.

Berindik ari nya, perintah udah nyediaka bantu mata duit ti pemadu besai nengah Bantu Prihatin Nasional (BPN) iya nya RM18 bilion ti meri penguntung ngagai 11 juta penerima.

“Bantu BPN udah mayuh meri pengelantang ngagai rayat, lalu bisi mega ke ngena bantu nya nyadika modal bedagang. Ba baruh pakej PEMULIH, perintah udah mantu raban B40 enggau M40 nengah tiga agi program bantu tunai, iya nya Bantu Prihatin Rayat, Bantu Khas COVID-19 enggau Bantu Lenyau Penatai Pemisi.”

Tengku Zafrul madahka, perintah mega nyediaka wang turu lebih RM200 juta ungkup program bantu bakul pemakai ti nerima mayuh peminta ari rayat ngambika program nya ulih diteruska.

Tags: #ib

Join our social media channel to get our news Alerts and highlights.

Leave a Reply

Your email address will not be published. Required fields are marked *