Enam Lelaki Ditangkap Ketegal Belaya Di Miri

Spread the love

MIRI, 23 Julai – Polis ngetan enam iku lelaki ti disangka belaya berebut ke siku indu ba Jalai Kwang Tung semak enggau Palan Transformasyen Mengeri (UTC) Miri lemai hari empat.

Ku Tuai Polis Pelilih Miri, ACP Hakemal Hawari madah, semua saspek lelaki nya peranak menua tu ti beumur entara 15 nynetuk ke 24 taun ditangkap ba sebuah kedai ba Jalai Kwang Tung.

Iya madahka, penusah nya nyadi urung pukul 5 lemai lalu asil  laya nya nyadi ketegal berebut ke siku indu enggau enda puas ati enggau pangan diri.

Lebuh penusah nya nyadi, sekeda ari saspek mai senyata sebatang besi enggau helmet mutosikal.

Berebak ari nya, polis ngelancharka operasyen nangkap semua saspek nya.

“Bisi enam iku saspek udah ditangkap ba dalam operasyen ti dikangauka Ops Pintu”, ku iya madah.

Hawari madahka, kes nya agi benung ditasat ba baruh Seksyen 148 Kanun Keseksaan ketegal ngereja penyalah ti ngepunka kachau ba endur mensia mayuh.

Berindik ari nya, iya ngelalau mensia mayuh ngambika anang sesekali ngereja jenayah kasar tauka ngereja pengawa ti salah sepeneka ati.

“Polis enda diau diri enti sema bisi sekeda orang ditemu ngereja penyalah ti ngeruga pengelantang komuniti,” ku iya madah agi.

Tags: #iban

Join our social media channel to get our news Alerts and highlights.

Leave a Reply

Your email address will not be published. Required fields are marked *