Perambu Deka Nambah 19 PPV IPT Di Serata Menua

Spread the love

OPIS Menteri Pelajar Tinggi (KPT) benung merambu deka nambah 19 agi Palan Meri Vaksin Institusyen Pelajar Tinggi (PPV IPT) dikena mantu menua nyapai imuniti kelompok lebih jampat agi.

Ku Menteri Pelajar Tinggi Datuk Seri Dr Noraini Ahmad madah, naka ke diatu bisi 26 PPV IPT udah dibuka di serata menua lalu penambah nya nyadika penyampau semua nambah ngagai 45 PPV IPT.

“KPT deka terus komited mantu Pelin Mulaika Pemanah Menua ti nyadi sebengkah ari strategi keluar chara berenggat ari pandemik COVID-19.

“Naka ke diatu, PPV IPT ke udah dibuka enggau beoperasyen ngembuan kapasiti 25,400 dos vaksin sehari. Nyentuk ke 21 hari bulan enam ke udah, bisi 200,016 iku orang udah nerima vaksin,” iya mansutka jaku nya ba dalam siti penerang maya hari minggu.

Kelimpah ari nya, Noraini nerima penemuai ari Direktor Pengerai Tan Sri Dr Noor Hisham Abdullah ke program rintis PPV Mindah Kin Kitu, Sepital Canselor Tuanku Muhriz (HCTM) Batu Pahat maya hari minggu.

Noraini nerangka, senentang PPV ke mindah kin kitu ba pun dipejalaika kenyau ari dua minggu ke udah dikena meri tuchuk vaksin ke lebih besai agi ngagai rayat di menua pesisir.

“Kelimpah ari HCTM, PPV IPT Unimas udah mujur nempa rikod iya nya meri vaksin ngagai 5,584 iku penerima vaksin sehari. Penyampau semua 37,758iku  penerima udah nerima vaksin di PPV nya kenyau ari palan nya dibuka sepuluh hari ke udah.” ku iya nerang agi.

Berindik ari nya, iya madahka, hari satu tu sebuah agi PPV IPT deka dibuka di Universiti Sains Islam Malaysia (USIM) ke ulih nerima kapasiti 3,000 iku penerima vaksin sehari.

PPV nya mega dikearapka ulih meri pemaik ngagai rayat tebal agi di Nengeri Sembilan.

Tags: #ib

Join our social media channel to get our news Alerts and highlights.

Leave a Reply

Your email address will not be published. Required fields are marked *