202,741 Udah Nerima Dua Dos Vaksin Di Sarawak

Spread the love

PROGRAM Betuchuk Vaksin COVID-19 Menua (PICK) ngerikodka tujuh juta lebih dos vaksin udah diberi ngagai rayat di serata menua tu.

Penyampau nya dirikodka naka hari lima kenyau ari program nya dipejalaika di Malaysia.

Menteri Pengerai, Datuk Seri Adham Baba madahka, penyampau nya nyerangkung lima juta lebih penerima dos ti keterubah enggau semak dua juta iku nerima tuchuk dos kedua vaksin.

“Naka hari lima (kemari) penyampau 215,968 tuchuk vaksin COVID-19 udah diberi ba serata menua.” ku iya madah ba dalam penerang twitter maya hari enam.

Ku Dr Adham Baba madah, ari penyampau tuchuk vaksin ke diberi naka hari lima,  148, 380 iya nya dos ti keterubah, seraya 67,588 iya nya tuchuk dos kedua.

Iya nerangka, lima nengeri ti ngerikodka orang ke udah nerima kedua-dua dos pemadu tinggi iya nya Selangor 262,635, dientudi ke Sarawak (202,741), Johor (201,340), Perak (181,545) sereta Kuala Lumpur (170,594).

Nangkan ke nya, indu ngandung dalam timpuh 14 nyentuk ke 33 minggu di menua tu agi diberatka nerima tuchuk vaksin COVID-19 bansa Pfizer-Biontech.

Ku Sapit Direktor Primer Begian Pemansang Pengerai Ruang Bilik Opis Menteri Pengerai (KKM), Dr Nazrila Hairizan Nasir madah, bansa vaksin nya dipilih seririh enggau tikas pengerai indai enggau anak ke dalam kandung.

Taja pan pia, iya madahka bansa vaksin bukai deka diberi enti sema bisi penanggul logistik enggau program nya dipejalaika di menua ulu tauka menua pesisir.

Tags: #ib

Join our social media channel to get our news Alerts and highlights.

Leave a Reply

Your email address will not be published. Required fields are marked *